Virūpakkhehi me mettaṃ
mettaṃ erāpathehi me
Chabyā-puttehi me mettaṃ
mettaṃ kaṇhā-gotamakehi ca

Apādakehi me mettaṃ
mettaṃ dipādakehi me
Catuppadehi me mettaṃ
mettaṃ bahuppadehi me

Mā maṃ apādako hiṃsi
mā maṃ hiṃsi dipādako
Mā maṃ catuppado hiṃsi
mā maṃ hiṃsi bahuppado

Sabbe sattā sabbe pāṇā
sabbe bhūtā ca kevalā
Sabbe bhadrāni passantu
mā kiñci pāpam-āgamā

Appamāṇo buddho
appamāṇo dhammo
appamāṇo saṅgho
Pamāṇavantāni siriṃsapāni

ahi-vicchikā sata-padī
Uṇṇā-nābhī sarabhū mūsikā
Katā me rakkhā katā me parittā
paṭikkamantu bhūtāni

So’haṃ namo bhagavato
namo sattannaṃ
sammā-sambuddhānaṃ