Bojjhaṅgo sati-saṅkhāto
dhammānaṃ vicayo tathā
Viriyam-pīti-passaddhi
bojjhaṅgā ca tathā’pare

Samādh’upekkha-bojjhaṅgā
satt’ete sabba-dassinā
Muninā sammad-akkhātā
bhāvitā bahulīkatā

Saṃvattanti abhiññāya
nibbānāya ca bodhiyā
Etena sacca-vajjena
sotthi te hotu sabbadā

Ekasmiṃ samaye nātho
moggallānañ-ca kassapaṃ
Gilāne dukkhite disvā
bojjhaṅge satta desayi
Te ca taṃ abhinanditvā
rogā mucciṃsu taṅ-khaṇe
Etena sacca-vajjena
sotthi te hotu sabbadā

Ekadā dhamma-rājā pi
gelaññenābhipīḷito
Cundattherena tañ-ñeva
bhaṇāpetvāna sādaraṃ
Sammoditvā ca ābādhā
tamhā vuṭṭhāsi ṭhānaso
Etena sacca-vajjena
sotthi te hotu sabbadā

Pahīnā te ca ābādhā
tiṇṇannam-pi mahesinaṃ
Magg’āhata-kilesā va
pattānuppatti-dhammataṃ
Etena sacca-vajjena
sotthi te hotu sabbadā